Inngangur
Formáli höfundar
Í HVERJUM einasta kafla þessarar bókar er minnst á það leyndarmál fjáröflunar sem hefur fært meira en fimm hundruð stórauðugum mönnum stórfé, en þá hef ég greint vandlega um margra ára skeið.
Andrew Carnegie vakti athygli mína á leyndarmálinu fyrir meira en aldarfjórðungi. Þessi glöggskyggni og elskulegi gamli Skoti varpaði því kæruleysislega inn í huga mér þegar ég var aðeins piltur. Síðan hallaði hann sér aftur í stólnum með glettnisblik í augum og fylgdist grannt með til að sjá hvort ég hefði nægilegt vit til að skilja til fulls þýðingu þess sem hann hafði sagt við mig.
Þegar hann sá að ég hafði gripið hugmyndina spurði hann hvort ég væri fús til að verja tuttugu árum eða meira í að búa mig undir að færa heiminum hana – körlum og konum sem án leyndarmálsins kynnu að fara í gegnum lífið sem misheppnaðir einstaklingar. Ég kvaðst mundu gera það og með samstarfi herra Carnegies hef ég efnt loforð mitt.
Þessi bók geymir leyndarmálið eftir að þúsundir manna úr nær öllum stéttum þjóðfélagsins hafa reynt það í verki. Hugmynd herra Carnegies var sú að töfraformúlan, sem færði honum gríðarlegt ríkidæmi, ætti að vera innan seilingar fyrir fólk sem hefur ekki tíma til að rannsaka hvernig menn afla fjár, og hann vonaðist til þess að ég gæti prófað formúluna og sýnt fram á ágæti hennar með reynslu karla og kvenna í öllum starfsgreinum. Hann taldi að kenna ætti formúluna í öllum almennum skólum og háskólum og lýsti þeirri skoðun sinni að ef hún væri rétt kennd myndi hún gjörbylta öllu menntakerfinu svo rækilega að minnka mætti þann tíma sem varið er í skóla niður í minna en helming.
Reynsla hans af Charles M. Schwab og öðrum ungum mönnum af sama tagi og herra Schwab sannfærði herra Carnegie um að margt af því sem kennt er í skólum er með öllu verðlaust þegar kemur að því að vinna fyrir sér eða safna auðæfum. Hann hafði komist að þessari ákvörðun vegna þess að hann hafði tekið inn í fyrirtæki sitt hvern unga manninn á fætur öðrum, marga hverja með sáralitla skólagöngu að baki, og með því að þjálfa þá í notkun þessarar formúlu þroskað með þeim fágæta forystu. Þar að auki færði þessi tilsögn hans hverjum einasta þeirra sem fylgdi fyrirmælum hans stórfé.
Í kaflanum um trú muntu lesa hina stórmerkilegu sögu af stofnun stórfyrirtækisins United States Steel Corporation, eins og hún var hugsuð og framkvæmd af einum af þeim ungu mönnum sem herra Carnegie sannaði með að formúla hans virkar fyrir alla sem eru tilbúnir fyrir hana. Þessi eina beiting leyndarmálsins af hálfu þessa unga manns – Charles M. Schwab – færði honum gríðarlegt ríkidæmi, bæði í peningum og TÆKIFÆRUM. Í stórum dráttum var þessi tiltekna beiting formúlunnar sex hundruð milljóna dala virði.
Þessar staðreyndir – og þær eru vel kunnar nánast öllum sem þekktu herra Carnegie – gefa þér góða hugmynd um hvað lestur þessarar bókar getur fært þér, að því tilskildu að þú VITIR HVAÐ ÞAÐ ER SEM ÞÚ VILT.
Jafnvel áður en leyndarmálið hafði gengist undir tuttugu ára hagnýta prófun var því miðlað til meira en hundrað þúsund karla og kvenna sem hafa nýtt sér það í eigin þágu, eins og herra Carnegie ætlaðist til. Sumir hafa skapað sér stórfé með því. Aðrir hafa notað það með góðum árangri til að skapa sátt og samlyndi á heimilum sínum. Prestur nokkur beitti því með svo góðum árangri að það færði honum meira en 75.000,00 dali í árstekjur.
Arthur Nash, klæðskeri í Cincinnati, notaði nær gjaldþrota fyrirtæki sitt sem „tilraunadýr“ til að prófa formúluna. Fyrirtækið lifnaði við og færði eigendum sínum stórfé. Það blómstrar enn þótt herra Nash sé fallinn frá. Tilraunin var svo einstök að dagblöð og tímarit veittu henni lofsamlega umfjöllun sem nam meira en milljón dölum að verðmæti.
Leyndarmálinu var miðlað til Stuarts Austin Wier frá Dallas í Texas. Hann var tilbúinn fyrir það – svo tilbúinn að hann sagði skilið við starfsgrein sína og lagði stund á lögfræði. Tókst honum ætlunarverk sitt? Sú saga er einnig sögð hér.
Ég færði Jennings Randolph leyndarmálið daginn sem hann útskrifaðist úr háskóla og hann hefur notað það með svo góðum árangri að hann situr nú sitt þriðja kjörtímabil á Bandaríkjaþingi, og hefur öll tækifæri til að halda áfram að nota það þar til það ber hann alla leið í Hvíta húsið.
Þegar ég starfaði sem auglýsingastjóri hjá LaSalle Extension University, á þeim tíma þegar skólinn var lítið annað en nafnið tómt, naut ég þeirra forréttinda að sjá J. G. Chapline, rektor háskólans, beita formúlunni af slíkum krafti að hann hefur síðan gert LaSalle að einum fremsta fjarkennsluskóla landsins.
Leyndarmálið sem ég vísa til er nefnt eigi sjaldnar en hundrað sinnum í þessari bók. Það hefur ekki verið nefnt berum orðum, því það virðist reynast mun betur þegar einungis er svipt af því hulunni og það skilið eftir í augsýn, þar sem ÞEIR SEM ERU TILBÚNIR og LEITA AÐ ÞVÍ geta tekið það upp. Þess vegna varpaði herra Carnegie því svo hljóðlega til mín án þess að nefna það ákveðnu nafni.
Ef þú ert TILBÚINN að færa þér það í nyt muntu bera kennsl á þetta leyndarmál að minnsta kosti einu sinni í hverjum kafla. Ég vildi óska að mér væri heimilt að segja þér hvernig þú munt vita hvort þú ert tilbúinn, en það myndi svipta þig miklu af þeim ávinningi sem þú hlýtur þegar þú gerir uppgötvunina á þinn eigin hátt.
Á meðan þessi bók var í smíðum tók sonur minn, sem þá var að ljúka síðasta ári sínu í háskóla, upp handritið að öðrum kafla, las það og uppgötvaði leyndarmálið af eigin rammleik. Hann nýtti sér upplýsingarnar með svo góðum árangri að hann réðst beint í ábyrgðarstöðu með byrjunarlaun sem eru hærri en meðalmaðurinn vinnur sér nokkurn tíma inn. Sögu hans er lýst stuttlega í öðrum kafla. Þegar þú lest hana muntu ef til vill láta af öllum efasemdum sem þú kannt að hafa haft í upphafi bókarinnar um að hún lofaði of miklu. Og ef þú hefur einhvern tíma misst kjarkinn, ef þú hefur þurft að yfirstíga erfiðleika sem drógu úr þér allan sálarþrótt, ef þú hefur reynt og mistekist, ef þú hefur einhvern tíma búið við hömlur vegna veikinda eða líkamlegs meins, þá gæti þessi saga af því hvernig sonur minn uppgötvaði og notaði formúlu Carnegies einnig reynst sú vin í eyðimörk glataðrar vonar sem þú hefur leitað að.
Woodrow Wilson forseti notaði þetta leyndarmál í ríkum mæli í heimsstyrjöldinni. Því var miðlað til hvers einasta hermanns sem barðist í stríðinu, vandlega vöfðu inn í þá þjálfun sem þeir hlutu áður en haldið var á vígstöðvarnar. Wilson forseti sagði mér að það hefði átt ríkan þátt í að afla þess fjár sem þurfti til stríðsrekstursins.
Fyrir meira en tuttugu árum veitti leyndarmálið hinum háttvirta Manuel L. Quezon (sem þá var fulltrúi Filippseyja á Bandaríkjaþingi) innblástur til að ávinna þjóð sinni frelsi. Hann hefur nú tryggt Filippseyjum frelsi og er fyrsti forseti hins frjálsa ríkis.
Það er einkennilegt við þetta leyndarmál að þeir sem á annað borð tileinka sér það og nota það finna hvernig þeir hrífast bókstaflega áfram til velgengni með lítilli fyrirhöfn, og þeir láta aldrei framar í minni pokann fyrir ósigri! Ef þú efast um þetta skaltu kynna þér nöfn þeirra sem hafa notað það, hvar sem þau eru nefnd, kanna afrekaskrá þeirra af eigin raun og sannfærast.
Það er ekki til neitt sem heitir EITTHVAÐ FYRIR EKKERT!
Leyndarmálið sem ég vísa til fæst ekki án endurgjalds, þótt gjaldið sé langt undir verðmæti þess. Þeir sem ekki leita þess af ásettu ráði geta ekki eignast það fyrir nokkurt verð. Það er hvorki hægt að gefa það né kaupa fyrir peninga, af þeirri ástæðu að það er í tveimur hlutum. Annar hlutinn er nú þegar í eigu þeirra sem eru tilbúnir fyrir það.
Leyndarmálið nýtist öllum jafn vel sem eru tilbúnir fyrir það. Menntun kemur þar hvergi nærri. Löngu áður en ég fæddist hafði leyndarmálið ratað í hendur Thomasar A. Edison og hann notaði það af slíkri hyggju að hann varð fremsti uppfinningamaður heims, þótt hann hefði aðeins notið þriggja mánaða skólagöngu.
Leyndarmálinu var miðlað til viðskiptafélaga herra Edisons. Hann notaði það með svo góðum árangri að þótt hann hefði þá aðeins 12.000 dali í árstekjur safnaði hann miklu stórfé og dró sig í hlé frá virkum viðskiptum enn þá ungur maður. Þú finnur sögu hans í upphafi fyrsta kafla. Hún ætti að sannfæra þig um að auðæfi eru ekki utan seilingar þinnar, að þú getur enn orðið það sem þú óskar að verða, að peningar, frægð, viðurkenning og hamingja standa öllum til boða sem eru tilbúnir og staðráðnir í að hljóta þessar blessanir.
Hvernig veit ég þetta? Þú ættir að hafa svarið áður en þú lýkur við þessa bók. Þú gætir fundið það í allra fyrsta kaflanum, eða á síðustu blaðsíðunni.
Á meðan ég vann að hinu tuttugu ára langa rannsóknarverkefni, sem ég hafði tekið að mér að beiðni herra Carnegies, greindi ég hundruð þekktra manna og viðurkenndu margir þeirra að þeir hefðu safnað sínum gríðarlegu auðæfum með hjálp leyndarmáls Carnegies; á meðal þessara manna voru:
HENRY FORD
WILLIAM WRIGLEY JR.JOHN WANAMAKERJAMES J. HILLGEORGE S. PARKERE. M. STATLERHENRY L. DOHERTYCYRUS H. K. CURTISGEORGE EASTMANTHEODORE ROOSEVELTJOHN W. DAVISELBERT HUBBARDWILBUR WRIGHTWILLIAM JENNINGS BRYANDR. DAVID STARR JORDANJ. ODGEN ARMOURCHARLES M. SCHWABHARRIS F. WILLIAMSDR. FRANK GUNSAULUSDANIEL WILLARDKING GILLETTERALPH A. WEEKSDANIEL T. WRIGHT DÓMARIJOHN D. ROCKEFELLERTHOMAS A. EDISONFRANK A. VANDERLIPF. W. WOOLWORTHROBERT A. DOLLAR OFURSTIEDWARD A. FILENEEDWIN C. BARNESARTHUR BRISBANEWOODROW WILSONWM. HOWARD TAFTLUTHER BURBANKEDWARD W. BOKFRANK A. MUNSEYELBERT H. GARYDR. ALEXANDER GRAHAM BELLJOHN H. PATTERSONJULIUS ROSENWALDSTUART AUSTIN WIERDR. FRANK CRANEGEORGE M. ALEXANDERJ. G. CHAPLINEHÁTTVIRTUR JENNINGS RANDOLPHARTHUR NASHCLARENCE DARROW
Þessi nöfn eru aðeins lítið brot af þeim hundruðum þekktra Bandaríkjamanna sem með afrekum sínum, fjárhagslegum og öðrum, sanna að þeir sem skilja leyndarmál Carnegies og beita því komast til mikilla metorða í lífinu. Ég hef aldrei þekkt nokkurn mann sem fékk innblástur til að nota leyndarmálið án þess að hann næði markverðum árangri í sinni útvöldu starfsgrein. Ég hef aldrei þekkt nokkurn mann sem skar sig úr fjöldanum eða safnaði auðæfum að einhverju ráði án þess að búa yfir leyndarmálinu. Af þessum tveimur staðreyndum dreg ég þá ályktun að leyndarmálið sé mikilvægara, sem hluti af þeirri þekkingu sem er nauðsynleg til að ráða eigin vegferð, en nokkuð það sem maður hlýtur í gegnum það sem í daglegu tali nefnist „menntun“. Hvað er MENNTUN annars? Því hefur verið svarað í fullum smáatriðum.
Hvað skólagöngu varðar höfðu margir þessara manna afar litla slíka að baki. John Wanamaker sagði mér eitt sinn að þá litlu skólagöngu sem hann hlaut hefði hann aflað sér á mjög svipaðan hátt og nútímaeimreið tekur inn vatn, með því að „moka því upp á ferðinni“. Henry Ford komst aldrei í framhaldsskóla, hvað þá háskóla. Ég er ekki að reyna að gera lítið úr gildi skólagöngu, heldur leitast ég við að lýsa þeirri einlægu sannfæringu minni að þeir sem ná tökum á leyndarmálinu og beita því muni ná háum metorðum, safna auðæfum og semja við lífið á eigin forsendum, jafnvel þótt skólaganga þeirra hafi verið af skornum skammti.
Einhvers staðar við lesturinn mun leyndarmálið sem ég vísa til stökkva fram af síðunni og blasa skýrt við þér, EF ÞÚ ERT TILBÚINN FYRIR ÞAÐ! Þegar það birtist muntu þekkja það. Hvort sem þú færð táknið í fyrsta eða síðasta kaflanum skaltu staldra við eitt andartak þegar það birtist og hvolfa glasi til minningar um þau tímamót, því sú stund mun marka mikilvægasta vendipunktinn í lífi þínu.
Nú vindum við okkur í fyrsta kafla og að sögu míns kæra vinar, sem hefur af rausn sinni viðurkennt að hafa séð hið dularfulla tákn, og eru viðskiptaafrek hans næg sönnun þess að hann hvolfdi glasi. Þegar þú lest sögu hans og hinar sögurnar skaltu hafa hugfast að þær fjalla um mikilvæg viðfangsefni lífsins, slík sem allir menn reyna á eigin skinni. Vandamálin sem spretta af viðleitni manns til að afla sér lífsviðurværis, finna von, hugrekki, lífsfyllingu og hugarró; til að safna auðæfum og njóta frelsis bæði á líkama og sál.
Mundu einnig, þegar þú ferð í gegnum bókina, að hún fjallar um staðreyndir en ekki skáldskap, og að tilgangur hennar er að miðla miklum algildum sannleika sem allir þeir sem eru TILBÚNIR geta lært af, ekki aðeins HVAÐ SKULI GERA, HELDUR EINNIG HVERNIG SKULI GERA ÞAÐ! og hljóta um leið ÞÁ HVATNINGU SEM ÞARF TIL AÐ HEFJAST HANDA.
Sem lokaorð til undirbúnings áður en þú hefst handa við fyrsta kaflann, leyfist mér að koma með eina stutta ábendingu sem gæti gefið vísbendingu um hvernig þekkja má leyndarmál Carnegies? Hún er þessi – ÖLL AFREK, ÖLL ÁUNNIN AUÐÆFI, EIGA UPPHAF SITT Í HUGMYND! Ef þú ert tilbúinn fyrir leyndarmálið býrðu nú þegar yfir öðrum helmingi þess, og því muntu auðveldlega þekkja hinn helminginn um leið og hann berst inn í huga þinn.