Hann kemur aftur!

Hvar erum við stödd á dagatali Guðs?

Ef hægt væri að setja dvöl mannsins á jörðinni frá dögum Adams og Evu inn á tólf stunda klukku, trúi ég að við værum alveg við lok elleftu stundarinnar, búin undir að klukkan slái tólf! Margt bendir til þess að við nálgumst óðfluga endalok tímans eins og við þekkjum hann!

Jesús er að koma! Hann sagði ekki hvenær, en hann sagði okkur þó að við gætum þekkt tímana og tíðirnar. Við getum þekkt árstíðirnar vegna þess að hver þeirra hefur sín eigin einkenni sem boða komu hennar. Þá kemur vorið, grasið tekur að grænka og litlu ræturnar fara að skjóta öngum. Þegar sumarið kemur springa blómin út. Þegar haustið gengur í garð verður allt appelsínugult og brúnt. Veturinn færir með sér kulda og snjó. Þú getur séð merkin og vitað hvaða árstíð er.

Hve mikill tími er eftir vitum við ekki, en hitt vitum við þó, að Guð hefur leyft okkur hverju og einu að lifa á stórkostlegustu og mest spennandi dögum allrar sögunnar ... dögum þegar fólk um allan heim bregst við Guði og því sem hann er að gera. Fólk af öllum trúarbrögðum, úr öllum stéttum þjóðfélagsins og af öllum þjóðernum heyrir kallið og er að vakna!

Fólk er að uppgötva að það mikilvægasta sem við getum staðið á er hið eilífa, ævarandi orð Guðs! Í hjörtum fólks um allan heim vaknar nú vaxandi hungur eftir dýpri skilningi á fyrirheitum Guðs. Fólk er að læra að Guð gengur aldrei gegn eðli sínu og hann gengur aldrei gegn orði sínu!

„Væri ekki svo, hefði ég þá sagt yður, að ég færi burt að búa yður stað? Þegar ég er farinn burt og hef búið yður stað, kem ég aftur og tek yður til mín, svo að þér séuð einnig þar sem ég er“ (Jóhannes 14:2, 3). JESÚS SAGÐI AÐ HANN KÆMI AFTUR!

Jóhannes 14:2, 3 · Biblían 1981

„Tákn munu verða á sólu, tungli og stjörnum og á jörðu angist þjóða, ráðalausra við dunur hafs og brimgný. Menn munu gefa upp öndina af ótta og kvíða fyrir því, er koma mun yfir heimsbyggðina, því að kraftar himnanna munu bifast. Þá munu menn sjá Mannssoninn koma í skýi með mætti og mikilli dýrð. En þegar þetta tekur að koma fram, þá réttið úr yður og lyftið upp höfðum yðar, því að lausn yðar er í nánd.“ (Lúkas 21:25-28).

Lúkas 21:25–28 · Biblían 1981

„Er þeir störðu til himins á eftir honum, þegar hann hvarf, þá stóðu hjá þeim allt í einu tveir menn í hvítum klæðum og sögðu: „Galíleumenn, hví standið þér og horfið til himins? Þessi Jesús, sem varð upp numinn frá yður til himins, mun koma á sama hátt og þér sáuð hann fara til himins.““ (Postulasagan 1:10, 11).

Postulasagan 1:10, 11 · Biblían 1981

Englaverur vitjuðu jarðarinnar þegar Jesús var hér. Þær vitja jarðarinnar í dag!

Tókuð þið eftir því að englarnir sögðu: „Þessi Jesús“? Englarnir tala í dag, rétt eins og þeir gerðu þá, og færa okkur þær gleðifréttir að hann sé að koma! Þessi sami Jesús er að koma aftur til jarðar! Ég veit vissulega ekki hvernig eða hvenær, en ég veit með vissu að hann ER að koma! Guð á sér eilífð fulla af leyndardómum sem hann hefur ekkert sagt okkur um, en eitt hefur hann gert fullkomlega ljóst og það er að Jesús er að koma!

Lærisveinarnir fundu fyrir einlægri og brýnni þörf til að búa sig undir endurkomu Drottins. Þeir hlökkuðu til þess tíma þegar „... sjálfur Drottinn mun stíga niður af himni með voldugu kalli, með hrífandi raust höfuðengilsins og hinum mikla básúnuhljómi Guðs“ (1. Þessaloníkubréf 4:16).Fyrra Þessaloníkubréf 4:16 · TLB

Páll sagði okkur að ef þú trúir því að Jesús hafi dáið og risið upp frá dauðum, þá verður þú líka að trúa því að hann komi aftur! Hann hvatti okkur: „Uppörvið því hver annan með þessum orðum“ (1. Þessaloníkubréf 4:18). Við höfum um eitthvað spennandi að tala við annað fólk! Þegar þú sérð fólk dapurt í bragði skaltu segja: „Hertu upp hugann, Jesús er að koma!“Fyrra Þessaloníkubréf 4:18 · Biblían 1981

Við finnum þessa jákvæðu trú víða í ritum Páls. Hann sagði að hluti af fagnaðarerindinu væri sá að Guð sér um hlutina svo að þú þurfir ekki að hafa áhyggjur, vera í sífelldu uppnámi og velta því fyrir þér hvort þú verðir tilbúinn eða ekki þegar Jesús kemur. Það geta verið margar hæðir og lægðir á veginum, en ef þú hefur tekið Jesú undir arminn og þjónar honum, þá tilheyrir þú fjölskyldu Guðs, og hann mun varðveita „anda þinn og sál og líkama sterk og vammlaus allt til þess dags þegar Drottinn vor Jesús Kristur kemur aftur. Guð, sem kallaði þig til að verða barn sitt, mun gera allt þetta fyrir þig, rétt eins og hann lofaði“ (1. Þessaloníkubréf 5:23, 24).Fyrra Þessaloníkubréf 5:23, 24 · TLB

Eitt af því fegursta við þessi skilaboð sem englarnir færa frá hjarta Guðs er að þau gera fólki kleift að vinna nýja sigra. Það getur slakað á, hætt að brjótast um og leyft lífi hans að streyma í gegnum sig. Þegar líf hans streymir þannig í gegnum okkur sér það um öll þau vandamál og þær aðstæður sem íþyngja þér. Þegar við höldum augum okkar á svarinu, sem er Jesús, í stað vandamálsins, mun okkur reynast auðvelt að leyfa lífi hans að streyma í gegnum okkur.

Jakob talaði um þetta í fimmta kafla, sjöunda og áttunda versi: „Þreyið því, bræður, þangað til Drottinn kemur. Sjáið akuryrkjumanninn, hann bíður eftir hinum dýrmæta ávexti jarðarinnar og þreyir eftir honum, þangað til hann hefur fengið haustregn og vorregn. Þreyið og þér, styrkið hjörtu yðar, því að koma Drottins er í nánd.“ Hann kemur kannski ekki þegar þú heldur að hann muni koma, því að enn er ýmislegt sem hann þarf að koma í verk, en sýndu þolinmæði, HANN ER AÐ KOMA!

Pétur talaði um þetta og ræddi um þann tíma þegar Jesús yrði opinberaður af himni. Í 1. Pétursbréfi 1:13 segir hann að þú getir hætt að hafa áhyggjur núna og hvílt í þeirri öruggu vissu að Jesús hafi meðferðis sérstakan farm af náð þegar hann kemur. Við þurfum ekki að horfa á veikleikana, sárindin og erfiðleikana í kringum okkur, heldur þurfum við að fara að horfa fram til þeirrar sérstöku náðar sem okkur verður færð við opinberun Jesú Krists þegar hann birtist af himni. „Og þetta er leyndardómurinn: að Kristur í hjörtum yðar er eina von yðar um dýrðina“ (Kólossubréfið 1:27).Kólossubréfið 1:27 · TLB · Fyrra Pétursbréf 1:13

Jóhannes talaði um endurkomu Jesú í 1. Jóhannesarbréfi 3:2, þar sem hann sagði að það væri enn þá ekki orðið bert hvað við munum verða, en við vitum að þegar hann birtist mun eitthvað gerast! „... munum vér verða honum líkir, því að vér munum sjá hann eins og hann er!“Fyrra Jóhannesarbréf 3:2 · Biblían 1981

Júdas talaði um endurkomu hans til jarðar í 24. versinu þar sem hann sagði: „En honum, sem megnar að varðveita yður frá hrösun og láta yður koma fram fyrir dýrð sína, lýtalausa í fögnuði.“ Júdas trúði þessu og hann var að hvetja fólk til að hætta að hafa áhyggjur af því að hrasa. Guð er nógu mikill til að kalla þig, hjálpa þér og frelsa þig frá syndum þínum.

Öll merki sögunnar segja okkur að hann er að koma! Siðferðisviðmið samfélagsins, sem bera vott um aukna virkni Satans, hin ytri tákn á þessari jörð og þær miklu andlegu hreyfingar sem við sjáum, benda öll til endurkomu Jesú! Það leikur enginn vafi á því. Eitthvað er að gerast í dag á hinu andlega sviði heimsins og við erum lifandi hluti af því!

Þegar ég hugsa um endurkomu Jesú minnist ég ljóslega þeirra hrífandi orða sem Gabríel sagði: „Aldrei hefur verið önnur eins eftirvænting og virkni í forgörðum himins frá því að Jesús kom í fyrra skiptið eins og einmitt núna!“

MARANATA, KOM BRÁTT, DROTTINN JESÚS!