Englar í erindagjörðum

Þetta eru dagar endurnýjaðs andlegs lífs! Undarlegir hlutir eru að gerast! Fólk er að vakna! Óvinir Krists yfirgefa herbúðir andstæðingsins og ganga í lið með Guði. Nýjar raddir heyrast sem boða fagnaðarerindið. Það sem við sjáum er vitnisburður um að her af himnum er á ferð!

Ég hef heyrt marga vitnisburði fólks sem var algjörlega frá Guði horfið; vinir höfðu talað við það, ættingjar höfðu talað við það og aðrir höfðu beðið fyrir því, en það stóð þrjóskt gegn Guði. Þetta virtist ólíklegasta fólkið til að koma til Jesú, en í sínu mikla ráði og tilgangi sendi Guð boð með himneskum sendiboða sem sneri því við. Þetta er að gerast í íþróttaheiminum, viðskiptaheiminum, skemmtanaheiminum og stjórnmálaheiminum! Fólk snýr sér til Guðs og kemst að því að hann er raunverulegur. Englaherskarar himins eru á ferð!

Öll fræðin um englana eru fögur! Þrettándi kafli Dómarabókarinnar bendir á spennandi sannindi um þá. „Ísraelsmenn gjörðu enn að nýju það, sem illt var í augum Drottins. Þá gaf Drottinn þá í hendur Filistum í fjörutíu ár. Maður er nefndur Manóa. Hann var frá Sorea, af ætt Daníta. Kona hans var óbyrja og hafði eigi barn alið.“

Í ráðsbók Guðs hafði hann ákveðið þessi fjörutíu ár, en á þeim tíma undirbjó hann fjölskyldu sem hann gat fært fólkinu frelsun í gegnum.

„Engill Drottins birtist konunni og sagði við hana: ,Sjá, þú ert óbyrja og hefir eigi barn alið, en þú munt þunguð verða og son ala. Og haf nú gætur á þér, drekk hvorki vín né áfengan drykk, og et ekkert óhreint. Því sjá, þú munt þunguð verða og ala son, og skal rakhnífur ekki koma á höfuð hans, því að sveinninn skal vera Guði helgaður allt í frá móðurlífi, og hann mun byrja að frelsa Ísrael af hendi Filista.‘ Þá fór konan og sagði við mann sinn á þessa leið: ,Guðsmaður nokkur kom til mín, og var hann ásýndum sem engill Guðs, ægilegur mjög; en ég spurði hann ekki, hvaðan hann væri, og nafn sitt sagði hann mér ekki. Hann sagði við mig: Sjá, þú munt þunguð verða og son ala. Drekk því hvorki vín né áfengan drykk, og et ekkert óhreint, því að sveinninn skal vera Guði helgaður allt í frá móðurlífi til dauðadags.‘ Þá bað Manóa Drottin og sagði: ,Æ, herra! Lát guðsmanninn, sem þú sendir, koma til okkar aftur, svo að hann megi kenna okkur, hvernig við eigum að fara með sveininn, sem fæðast á.‘ Guð heyrði bæn Manóa, og engill Guðs kom aftur til konunnar. Var hún þá stödd úti á víðavangi og maður hennar Manóa ekki hjá henni. Þá hljóp konan sem skjótast og sagði manni sínum frá og mælti við hann: ,Sjá, maðurinn, sem til mín kom um daginn, hefir birst mér.‘ Þá reis Manóa upp og fór á eftir konu sinni, og hann kom til mannsins og sagði við hann: ,Ert þú maðurinn, sem talaði við konuna?‘ Hann svaraði: ,Já.‘ Þá sagði Manóa: ,Ef það nú kemur fram, sem þú hefir sagt, hvernig á þá að fara með sveininn, og hvað á hann að gjöra?‘ Engill Drottins sagði við Manóa: ,Konan skal forðast allt það, sem ég hefi sagt henni. Hún skal ekkert það eta, er af vínviði kemur, ekki drekka vín né áfengan drykk, og ekkert óhreint eta. Hún skal gæta alls þess, er ég hefi boðið henni.‘ Þá sagði Manóa við engil Drottins: ,Leyf okkur að tefja þig stundarkorn, svo að við getum matbúið handa þér hafurkið.‘ En engill Drottins sagði við Manóa: ,Þó að þú fáir mig til að tefja, þá et ég samt ekki af mat þínum. En ef þú vilt tilreiða brennifórn, þá fær þú hana Drottni.‘ Því að Manóa vissi ekki, að það var engill Drottins. Þá sagði Manóa við engil Drottins: ,Hvert er nafn þitt? Því að rætist orð þín, munum við tigna þig.‘ Engill Drottins svaraði honum: ,Hví spyr þú um nafn mitt? Nafn mitt er undursamlegt.‘ Þá tók Manóa geithafurinn og matfórnina og færði það Drottni á kletti einum. Þá varð undur mikið að þeim Manóa og konu hans ásjáandi. Því að þegar logann lagði upp af altarinu til himins, þá fór engill Drottins upp í altarisloganum. Og er þau Manóa og kona hans sáu það, féllu þau fram á ásjónur sínar til jarðar“ (Dóm. 13:1-20).

Dómarabókin 13:1–20 · Biblían 1981

Þetta er fögur saga með sannindum sem eru í fullu gildi og eiga erindi við okkur í dag. Guð sá til þess að boðskapurinn sem engillinn flutti kæmi fram.

Englar geta tekið á sig mynd manns, en mynd þeirra er ekki nauðsynleg til að þeir séu nálægir. Í þessari sögu birtist engillinn svo að hægt væri að sjá hann með náttúrlegum augum.

Biblían segir okkur að englarnir séu sendiboðar Guðs og geri það sem hann býður. Hann gefur merkin og kallar út fyrirmælin til þeirra. Þess vegna sagði Manóa, þegar hann bað: „Guð, sendu engilinn.“ Þessi lexía sýnir glöggt að við eigum ekki að biðja til englanna, og við getum heldur ekki skipað þeim að gera neitt! Hún sýnir líka að engillinn dvaldi nokkra stund hjá þeim, átti samræður við þau og fræddi þau jafnvel.

Englana má aldrei tilbiðja. Þeir eru þannig skipaðir og skapaðir að í allri veru þeirra er ekkert rúm fyrir lof eða heiður. Þeir eru kallaðir hersveitir Drottins, og tilgangur þeirra er að þjóna hinum eilífa Guði.

Víða í Biblíunni eru fagrir kaflar sem segja sögur af englum. Af því að Chrioni hafði tekið þátt í mörgum þessara atburða sagði hann mér nokkrar af þessum sögum, og þær urðu ljóslifandi!

Í Jósúabók 5:13,14 voru Ísraelsmenn nýfarnir yfir Jórdan og tilbúnir að halda inn í fyrirheitna landið. Jósúa gekk út og sá mann með brugðið sverð í hendi og spurði hann hvort hann fylgdi Ísraelsmönnum eða andstæðingum þeirra.Jósúabók 5:13, 14

Ef engill segði hinum trúuðu í dag það sem hann sagði Jósúa yrðu þeir líklega niðurdregnir, því þessi engill sagði: „Rangt í báðum tilvikum! Ég er ekki með óvinum þínum, og ég tilheyri ekki her þínum. Ég er hluti af öðrum her, og ég er kominn með fyrirmæli frá Guði. Allt í kringum mig og að baki mér, í miklum og voldugum fylkingum, stendur ógrynni engla. Þú sérð þá ekki, Jósúa, en þeir eru heill herskari, og ég er höfðinginn!“

Af því að einhver spurði mig hvort þessi ritningargrein ætti við Jesú sem engil, spurði ég Chrioni, og hann sagði að svo væri ekki, því að hann sjálfur (Chrioni) hefði verið þar sem fyrirliði fyrir hersveit Drottins. Þegar Jósúa féll fram á ásjónu sína til að tilbiðja, bauð Chrioni honum að taka af sér skóna; „því að sá staður, sem þú stendur á, er heilagur“ (Jós. 5:15). Þetta er nákvæmlega það sama og engill Drottins sagði við Móse úr brennandi runnanum! (2. Mós. 3:4-5).Jósúabók 5:15 · Önnur Mósebók 3:4–5

Chrioni sagði að Guð hefði í sínu mikla ráði lagt allt niður fyrir sér. Jeríkó var fyrsta borgin sem þeir komu að, og með miklum sigri fyrir Guð þar myndu hinir konungarnir og herirnir óttast Ísraelsmenn og vita að Guð væri með þeim þegar þeir sæju mikið kraftaverk. Þess vegna sendi Guð Chrioni með flokk engla og með fyrirmæli sín um Jeríkó. Guð vissi nákvæmlega hvernig borgin yrði unnin!

Ef við gætum einhvern veginn teygt okkur aftur í tímann og litið á bardagaáætlanir Guðs fyrir þennan englaher myndu þær líklega hljóma eitthvað á þessa leið: „Ísraelsmenn eru bandamenn okkar. Þeir ætla að ganga kringum þessa múra í sjö daga, og síðasta daginn ganga þeir sjö sinnum í kring. Ég hef þegar gefið þeim fyrirmæli sín, svo við verðum að samræma þau því sem við gerum hér. Prestarnir eiga að þeyta lúðra sína og fólkið að hrópa á gefnu merki. Þegar þið heyrið hróp þeirra, ÞRÝSTIÐ MÚRUNUM NIÐUR!“

Chrioni sagði mér að englarnir hefðu tekið sér stöðu ofan á þessum múrum og beðið eftir hrópinu! Ísrael vissi ekki einu sinni hvað var að gerast, en Guð vissi það, og englarnir vissu það! Þeir biðu, og þegar þeir heyrðu hrópið þrýsti hver einasti engill sem þar var af öllu afli og öllum mætti, og hinir miklu og þykku múrar gengu NIÐUR í jörðina! Þessir múrar voru svo þykkir að hægt hefði verið að byggja á þeim hús, og hefðu þeir oltið um koll eða þeim verið ýtt um koll, þá hefði samt staðið múr eftir, því að þeir voru álíka þykkir og þeir voru háir! Guð sagði við englana: „Þrýstið þeim niður.“ Og Biblían segir okkur að múrarnir hafi fallið „flatir“ (Jós. 6:20). Þeir þurftu ekki einu sinni að þræða sig fram hjá sprungum og grjóthröngli, því að múrunum var þrýst NIÐUR í jörðina!Jósúabók 6:20

Þetta var verk englanna. Ég get séð fyrir mér Chrioni skoða fyrirmæli sín og taka eftir sérstöku ákvæði sem Guð hafði sett fyrir einn lítinn hluta þessa múrs. Þegar Rahab verndaði njósnarana tvo sem sendir voru til að kanna fyrirheitna landið, gaf Guð henni fyrirheit og fullvissaði hana um að hann skyldi vernda hana og fjölskyldu hennar. Ég get beinlínis séð Chrioni skipa sumum af englum sínum að fara að þessum hluta múrsins og halda honum uppi, meðan hinir þrýstu niður á það sem eftir var af múrnum!

Einhver sagði mér nýlega að uppgröfturinn sjálfur sýni að múrunum hafi verið þrýst niður eins og í lyftugöng. Hugsaðu þér þrýstinginn sem englarnir settu á þá! Mér hefur líka verið sagt að í fornleifafundum úr greftri hinnar fornu Jeríkó sjáist enn merki um múrinn þar sem hús Rahabar stóð. Hallelúja!

Það gerir Biblíuna sannarlega ljóslifandi að vita að englarnir sem hjálpuðu til við að sjá um Jeríkó eru enn á ferli og starfa enn með okkur undir leiðsögn heilags anda.

Guð á heila eilífð fulla af englum. Hann stendur ekki uppi án bjargráða, og þótt hann gæti gert allt sjálfur, því hann er Guð, þá hefur hann engla og fólk að starfi með sér öllum stundum.

Engill Drottins kom í veg fyrir að Bíleam bölvaði Ísrael! Bíleam freistaðist til að bölva Ísrael fyrir fé, en Guð sagði englinum að leyfa honum það ekki. Ég get ímyndað mér Bíleam reyna að bölva Ísrael, og í hvert sinn sem hann byrjaði sneri engillinn tungu hans við, svo hann blessaði þá í staðinn. Hann hefur líklega sagt: „Hvað er eiginlega að mér, er ég að missa vitið?“ Svo byrjaði hann aftur að bölva, og aftur kom út blessun!

Hann áttaði sig ekki á því að þarna stóð stór engill sem setti aðra „plötu“ á fóninn í munni hans, og Ísrael var blessaður! Þetta var svo mjög að fyrirmælum Guðs að hann lét jafnvel asna tala! Það hræddi Bíleam verulega, og hann reyndi að knýja asnann áfram, en asninn var þrjóskur, svo í staðinn sneri hann sér við og sagði: „Bíleam, hef ég ekki þjónað þér vel öll þessi ár?“

Hvers vegna skyldi Guð nokkru sinni leyfa að slík saga væri sett í Biblíuna? Af því að hún gerðist! Þessi asni talaði vegna nærveru engils Guðs, þótt hann kynni ekki að tala!

Hér eru nokkrar ritningargreinar sem hjálpa okkur ekki aðeins að þekkja og gera okkur grein fyrir þeim sannleika að englar eru með okkur, heldur líka að vera meðvituð um nærveru þeirra og vita að við megum vænta hjálpar Guðs í gegnum þennan her af himnum.

Engill kom til Sakaría og Elísabetar með þann boðskap að Jóhannes skírari myndi fæðast (Lúk. 1:11-20).Lúkas 1:11–20

Engillinn Gabríel kom til Maríu og sagði henni að Jesús, sonur Guðs, myndi fæðast henni (Lúk. 1:26-35). Það var ráð Guðs sem kom fram á réttum tíma, einmitt eins og hann hafði undirbúið, ráðgert og skrifað niður áður en hann skapaði jörðina.Lúkas 1:26–35

Hann gaf nákvæmlega réttan tíma, svo að á tilteknum degi væri allt til reiðu. Jesús bauð sig fram sem fórn á nákvæmlega þeim degi sem Guð hafði ætlað honum að gera það. Þetta var sannarlega ekki eitthvað sem Guð ákvað aðeins fáum árum áður en það gerðist!

Hann leyfði Daníel að líta yfir öxl sér og sagði: „Daníel, ég ætla að sýna þér nokkrar af áætlunum mínum. Ísrael mun fara í útlegð í sjötíu ár. Þegar sjötíu árin eru liðin mun konungur gefa út tilskipun um að endurreisa Jerúsalem. Ef þú vilt byrja að telja og telur 483 ár, þá munt þú finna mann sem er ekki einu sinni fæddur enn.“

Hann sagði frá herför Alexanders mikla, og frá hershöfðingjunum fjórum sem myndu taka við í stað sona hans fjögurra, því Guð hafði ráðgert það svo. „En,“ sagði hann, „að loknum 483 árum mun Jesús gefa líf sitt fyrir heiminn. Hann mun deyja, ekki fyrir sjálfan sig, heldur fyrir syndir heimsins!“ Á nákvæmlega réttum tíma dó Jesús fyrir syndir heimsins!

Í öllu sem Guð gerir er hann að segja okkur að hann elskar okkur, að honum er annt um okkur, að hann þráir okkur og að hann mun hjálpa okkur!

Engill varaði Jósef við. „Eftir að þeir voru farnir vitraðist engill Drottins Jósef í draumi. ,Rís upp og flý til Egyptalands með barnið og móður þess,‘ sagði engillinn, ,og ver þar uns ég segi þér að snúa aftur, því að Heródes konungur ætlar að reyna að fyrirfara barninu‘“ (Matt. 2:13).Matteus 2:13 · TLB

Eftir að Jesús var skírður í ánni Jórdan segir orðið: „Þá var Jesús leiddur af heilögum anda út í óbyggðina til þess að Satan freistaði hans þar. Í fjörutíu daga og fjörutíu nætur neytti hann einskis og varð mjög hungraður. Þá freistaði Satan hans til að afla sér matar með því að breyta steinum í brauðhleifa. ,Það mun sanna að þú ert sonur Guðs,‘ sagði hann. En Jesús sagði við hann: ,Nei! Því að ritningarnar segja okkur að brauð næri ekki sálir manna; hlýðni við sérhvert orð Guðs er það sem við þörfnumst.‘ Þá tók Satan hann með sér til Jerúsalem, upp á þak musterisins. ,Stökktu niður,‘ sagði hann, ,og sannaðu að þú ert sonur Guðs; því að ritningarnar segja: Guð mun senda engla sína til að varðveita þig frá meini ... þeir munu forða þér frá því að kremjast á klettunum fyrir neðan.‘ Jesús svaraði: ,Þar segir líka að þú skulir ekki freista Drottins, Guðs þíns, með heimskulegum hætti!‘ Næst tók Satan hann upp á tind ofurhás fjalls og sýndi honum þjóðir heimsins og alla dýrð þeirra. ,Allt þetta mun ég gefa þér,‘ sagði hann, ,ef þú aðeins fellur á kné og tilbiður mig.‘ ,Vík brott héðan, Satan,‘ sagði Jesús honum. ,Ritningarnar segja: Tilbið einan Drottin Guð. Hlýð honum einum.‘ Þá fór Satan burt, og englar komu og önnuðust Jesú“ (Matt. 4:1-11).Matteus 4:1–11 · TLB

Í Lúkasi 22:43 lesum við einnig að engill af himni kom niður og styrkti Jesú og þjónaði honum á Olíufjallinu á stund neyðar hans.Lúkas 22:43 · Biblían 1981

Engla er getið víðs vegar í allri Biblíunni, frá fyrstu Mósebók til Opinberunarbókarinnar. Í 1. Mós. 24:7 sendi Guð engil til að sækja brúði handa Ísak. Þetta var enn einn þáttur í ráði Guðs. Í 2. Mós. 23:20 sendi hann „engil á undan þér til að varðveita þig á ferðinni og leiða þig til þess staðar, sem ég hefi fyrirbúið.“ Hann sendi engla sína til að ryðja brautina við brottförina úr Egyptalandi.Önnur Mósebók 23:20 · Biblían 1981 · Fyrsta Mósebók 24:7

Í Sálmi 34:8 lét heilagur andi Davíð rita þessi orð: „Engill Drottins setur vörð kringum þá er óttast hann, og frelsar þá.“Sálmarnir 34:7 · Biblían 1981

Hugsaðu þér Daníel þegar honum var kastað í ljónagryfjuna (Dan. 6:23). Konungurinn var viss um að Daníel yrði étinn og ekkert eftir nema tætlur þarna niðri að morgni. Konungurinn svaf ekki þá nótt, því að hann kvaldist við þá tilhugsun að þessi grimmu ljón myndu éta Daníel. Hann hugsaði um það hræðilega verk sem hann hafði unnið með því að kasta Daníel í ljónagryfjuna, svo að það fyrsta sem hann gerði að morgni var að hlaupa til, gægjast niður og hrópa: „Æ, Daníel, þjónn hins lifanda Guðs, hefir Guð þinn, sá er þú dýrkar án afláts, megnað að frelsa þig frá ljónunum?“ „Gerði hann það?“ Hann átti varla von á svari, en hugsaði sem svo að hann skyldi reyna samt. „Guð minn sendi engil sinn,“ sagði hann, „til að loka munni ljónanna, svo að þau geta ekki snert mig“ (Dan. 6:21, 23).Daníelsbók 6:20, 22 · TLB · Daníelsbók 6:22

Englar Guðs eru voldugir! Af því að þeir vinna verk Guðs, er máttur þeirra takmarkalaus. Ef einn einasti engill gat gert svo mikið, hugsaðu þér hvað herskarar himins sem ganga fram í dag geta gert! Hugsaðu þér hvað þeir geta áorkað. Í hvert sinn, þegar ráð Guðs kom fram og nýr kafli opnaðist, urðu englar Guðs sýnilegir og báru fram boðskap, og á okkar dögum hefur fólk um allan heim fengið vitjanir sýnilegra engla.

Þetta ætti að segja okkur nokkuð. Guð lætur þennan heim ekki ganga sér til húðar án þess að hann taki eftir og gefi honum gaum. Nýr kafli er að opnast! Jesús er um það bil að koma! Hallelúja! Mesti björgunarleiðangur sem nokkru sinni hefur verið farinn í öllum alheiminum er í þann mund að hefjast. Hann hefur englana sína úti að störfum núna. Þeir hafa ekki aðeins birst í fágætum tilvikum, heldur berast fréttir hvaðanæva af landinu um að englaverur sjáist!

Ég varð hrærður þegar kristinn bróðir, John Weaver, prestur í Christian Center í Bozeman í Montana, sagði frá því hvernig engill vitjaði hans tvívegis. Þegar engillinn vitjaði hans í fyrra sinnið gaf hann honum fyrirmæli. Hann hélt að þetta væri draumur og að fólk myndi hlæja að honum, en engillinn hitti hann aftur tveimur vikum síðar meðan hann ók bíl sínum á heimleið af samkomu.

Bíllinn var á ferð, hurðir og gluggar lokaðir, framsætið við hlið hans autt, þegar þessi engill settist allt í einu niður við hlið hans. Hann talaði við hann um stund og minnti hann á verkefnið sem Guð hafði falið honum. Þegar séra Weaver sagðist myndu gera það sem Guð hafði sagt honum, fór engillinn út sömu leið og hann kom inn, og þótt bíllinn væri á um 80 kílómetra hraða hvarf hann einfaldlega! Fyrst engillinn sem vitjaði Manóa gat stigið inn í loga og horfið, hví skyldi engill þá ekki geta stigið út úr bíl á ferð án þess að skaðast!

Biblían segir okkur að Guð hafi ekki breyst. Orðið segir að fólk hafi hýst ókunnuga menn án þess að vita að þeir væru englar. Þú þekkir þá ekki alltaf þegar þú sérð þá, nema þú sjáir þá til dæmis stíga inn í eld og hverfa upp í loga, stökkva út úr bíl á ferð án þess að lenda á jörðinni, eða þeir veki þig um miðja nótt, en þeir eru á ferli.

Ekki einn einasti engill hefur nokkru sinni dáið. Máttur þeirra hefur ekki dvínað; þeir eru enn voldugir! Þeir hafa verið sendir út til að hjálpa okkur, til að annast okkur og sjá fyrir okkur, og til að tjalda umhverfis okkur. Sálmur 91:11 segir að hann hafi falið þeim umsjá okkar. Þeir koma jafnhratt og fyrirmæli Guðs eða hugsun Guðs. Þeir geta birst sem venjulegur maður á götunni, þeir geta birst sem óljós, nær ósýnileg vera, eða þeir geta birst sem jafn greinileg manneskja og þú eða ég. En eitt getur þú verið viss um: þú getur greint skýran mun á raunverulegum englum og ímyndun þinni. Þú þarft ekki að berjast við að sjá þá til að vita að þeir eru þar. Þeir munu gera það ljóst að þeir eru raunverulegir englar, ef það er erindi þeirra.Sálmarnir 91:11

Englarnir ryðja okkur braut alveg eins og þeir ruddu fólki braut í Biblíunni. Guð vill að við séum okkur þess meðvituð að hann er ekki hjálparvana einhvers staðar úti í horni, heldur hafa englar hans verið sendir út með það verkefni að annast fólk hans.

„Eftir að Pétur og Jóhannes höfðu vitnað og prédikað í Samaríu sneru þeir aftur til Jerúsalem ... En hvað Filippus varðar mælti engill Drottins til hans: ,Farðu út á veginn sem liggur frá Jerúsalem um Gasa-óbyggðina og vertu kominn þangað um hádegisbil.‘“ (Post. 8:25-27). Hver var tilgangurinn með því að engillinn sagði honum að fara þangað? Sá að hann gæti hitt eþíópíska hirðmanninn og leitt hann til Jesú! Guð er að gera það sama í dag!

Postulasagan 8:25–27 · TLB

Það væri spennandi að sjá hvað englarnir eru að gera einmitt núna í sambandi við óhólpna ástvini þína. Þú gætir haldið að ekkert á himni né jörðu gæti haggað þeim og snúið þeim til Guðs, en þarna úti eru englar sem toga í þá og fylgja þeim eftir, því Guð vill að þeir séu hans. Englar hafa fengið sérstakt verkefni frá Guði til að hjálpa þér og vinum þínum og ættingjum að finna hann!

Guð elskar okkur svo heitt að hann hefur undirbúið allt sem við þörfnumst okkur til frelsunar og hjálpar. Hann hefur sent heilagan anda sinn til að vera með okkur, til að fræða okkur og vaka yfir okkur. Englarnir tjalda umhverfis okkur! Hvernig getum við tapað?

Englar eru að sinna verkefnum í dag! Hallelúja!